Гісторыя дрэва, якое было змушана пакінуць парк, дзе ўсё сваё жыццё прапрацавала дрэвам. Яго чакае дарога, напоўненая прыгодамі: то цудоўнымі, то небяспечнымі, а то і абсалютна нечаканымі. Гэта гісторыя пра тое, што кожны можа дапамагаць іншым, знайсці сяброў і сваю важную справу, нават калі ты пазбаўлены дома і звыклага ўкладу жыцця. Спектакль для сямейнага прагляду. 

​

Тэатр КАРТОНКА быў заснаваны ў 2011 годзе Святланай Бень і Лінай Хeссэ. Гэта тэатр які натхняецца традыцыямі папяровага настольнага тэатра, тэатра малых форм.

​

СВЯТЛАНА БЕНЬ -  беларуская актрыса, рэжысёрка, паэтка, заснавальніца незалежнага лялечнага тэатра КАРТОНКА. Выпускніца Віцебскага мастацкага вучылішча і Беларускай дзяржаўнай акадэміі мастацтваў, аддзяленне рэжысуры тэатра лялек, дзе вучылася ў прафесара Аляксея Ляляўскага. Працуе рэжысёркай у тэатрах лялек, а таксама ўдзельнічае ў міжнародных праектах. З’яўляецца лідаркай вядомага беларускага музычнага гурта "Сярэбранае вяселле". З 2022 года жыве ў Берліне.

 

ЛІНА ХЕССЭ - нямецкая мастачка,  ілюстратарка, медыяпедагагіня, артыска тэатра КАРТОНКА, заснавальніца і выкладчыца студыі для дарослых і дзяцей «Zuckerwattenkrawatten» у Берліне, дзе ствараюцца казкі, кніжныя ілюстрацыі, настольныя гульні і іншыя цікавыя праекты.